Radijo Kaktus / WEBRADIO oe1campus
11.12.2009, 20:00 & 12.12., 20:30 & 14.12., 11:30 orenge

„Le Romen andi Austrija latsche flogosgere grupnengere tschatschiptscha hi, ham o atentatscha ando Burgenland ando bersch 1995 sikan, hot adaj meg mindig tel dikiptscha taj diskriminacija del“, phenel i Katalin Bársony ando vakeripe la Gilda Horvathaha andar o radijo Kaktus.

I ungriki Romengeri regiseurkija Katalin Bársony andi Austrija sina. I 27-berschengeri ungriki andar Budapest 2009 pra dokumentacijaha pedar o Roma andi Italija „Lashi Vita/Schukar ileto“ le CIVIS medijakere dipeske nominirim sina. Andi Austrija kerel oj akan jek dokumentariskero film pedar i situacija le Romendar. O film schaj ando 22. decemberi 2009 upro „DUNA TV“ andi ungriki tschib schaj dikes, i dokumentacija ham te telutne alavenca andi englitiki, francitiki taj Romanes ando internet tel te vrischtschanel hi.

Inter-Culture Club ando Club Ost

Tschatschikan interkultureli sikatscha pe o benefic la inicijativatar „Minderheiten Inter-Culture-Club“ ando Club Ost. Te i flogoskeri grupn le Romendar pumaro than uschtidine uso mindenfelitiko tradipe. O „Tamburiza-Orchester Salas“ loschantscha le dschenen pumara muschikaha andar i balkanitiki regijona. La bandatar „Salas“ o Milos Jovanović phenel, hot i Romani muschika andar o Balkan taj andar o Ungriko nisaj probelamakero koja iste kerel. I Ruža Nikolić-Lakatos presentirintscha dschila andar o vilago le Lovarendar. Oj mangla, hot o Roma pumari Romani tschib Romanes te vakeren taj tel te likeren la. Oj imar akan le cile Romenge schukar Boschitscha kivaninel.

I Cornelia Kogoj, andar i inicijativa „Minderheiten“, phukal pra butjatar so ando arto bersch kerdo te ol: planim hi jek alfabetisirungakero kurs – taj jek medijakero projekto le Romenge.

Emmerich Gärtner-Horvath, ORF Volksgruppenredaktion
volksgruppen.orf.at

Tweet