Khetanbutschalinipe sar le meg na dija: Nevi bib­li­jo­teka le flo­gos­kere grup­nen­dar Erbate

Le priksidlinipeha ando flogoskero grup­nen­gero kher, te o litera­tura­kere- taj medi­jen­gere kon­tingen­tscha le flogos­kere grup­nen­gere farajn­tschen­dar jek nevo kheripe lakle. Valami 9.000 tematscha la ungrika, horvacka taj Romen­gera-flo­gos­kera grup­natar akan andi khetani bibli­joteke khere hi. Afka o funda­mento la „Biblijo­tekake ando Kher le flogos­kere grup­nen­dar Burgenland“ kerdo hi.

I khetani biblijoteka ojs „dokumentacijonakero- taj infor­ma­cija­kero centrum la litera­turake taj le medi­jenge pedar o flogos­kere grupn ando Burgen­land hajol pe“. Ando kontingen­tscha histo­rischi taj adiveses­keri litera­tura, fochis­kere publi­kaciji, duj tschib­tscha­kere tscha­vengere kenvi, sikaji­pes­kere kenvi, CDs taj DVDs taj te faraj­niskere publi­kaciji ando trin flogos­kere grup­nengere tschib­tscha taj te ando nimtschko del, taj te papru­schen­gere nevip­tscha upre paschlon.

Ojs schpecijali biblijoteka pradime karateriha, irinel pe i biblijo­teka use minden­felitike ciliskere grupn: Dschene le trin flogos­kere grup­nendar, dschene, saven interesi upre flogos­kere grup­nengere tematscha hi taj igen barikano uso tschave taj terne, kaj lengere tschib­tscha­kere siklipeske pomo­schim te ol. Pasche, o dipe la flogos­kera grup­nengera biblijotekatar te use visen­schoft­lichi kheta­nip­tscha pe irinel, regijo­nali taj te inter­naci­jonali. 

Trin kontingentscha, schtar tschibtscha

O lek bareder falato le aktujeli dipestar o Burgenlanditiko-Ung­riko Kultura­kero Farajn (BUKV, Burgen­landi Magyar Kultúre­gye­sület) ande ledschija, ham te o Horvacko Kultu­rakero Farajn ando Burgen­land (HKD, Hrvatsko kulturno društvo u Gradišću) taj o farajn Roma-Service lengere khetan kedip­tscha ande ledschine taj ada bajder ar baunina. La ungrika flogos­kera grup­nake andi biblijo­teka te jek sikli­pes­kero ken­vakero khetan kedipe del, savo le mesch­terki­jendar taj mesch­ter­tschen­dar lengere isch­kolasch­kijenge taj isch­kolasch­tschenge lim schaj ol. Jek barikano phari­peskero punkto le horvacke dipestar upri tscha­ven­geri- taj ternen­geri litera­tura paschlol. Taj ando medi­jen­gero kon­tin­gento le Romendar, o cile barikane kenvi pedar i flogoskeri grupn ando Burgenland taj andi Austrija ande hi, taj te o cile pub­likaciji, save Romen­dar taj Romn­jendar andi Austrija ari dim ule.

Akan i biblijoteka meg ande lakeri kesdipes­keri buti hi taj o trin kojen­gero ulajipe meg esbe te lel hi. La cajtaha, o diptscha le jekoschne farajn­tschen­dar ham khetan te fojinen: use jek kheta­nipes­keri bibli­joteka jeke katalogiha, jeke dipeha taj jeka organi­saci­jonaha.

I biblijoteka ando Kher le flogoskere grupnen­dar, Schulgasse 33, Erbate hi. Prado: Het. dschi Tschet., 14:00-16:00 orenge, vaj pal arkeripe. Le dsche­nenge te jek skeneri del, saveha on, skeninip­tscha schaj keren, savenge nischta te potschi­nel nan.

Pomoschago uschtidel i biblijoteka le Austritike Flogos­kere Grupnen­gere Cent­rumistar, le bunda­kere minis­teri­jumis­tar le sikadi­peske taj la repub­likatar Horvacko. Dschene, save uso BUKV use hi taj te kursis­kere dschene, dschimeg o kurs ar nan, auto­mati­schi and pisim hi. Le avrenge tschak jek dsche­nen­gero legiti­macijo­nakero papru­schi pekamlo hi, kaj jeke berscheske and schaj pumen pisinen. Le tscha­venge telal 14 berscha, jek telal­pi­sinipe la dajatar vaj le dadestar pekamlo hi.

(dROMa)

Tweet