O EU-socijalakero komisari Vladimir Špidla gejng jek ranking odole vilagojendar pe ar vakertscha, save igen bibastale gejng o Roma taj o Sinti hi. Use jek konferenca le schvedijakere integracijonakere schtotiskere sekreteriha taj le EU-rotiskere angle beschtoha Christer Hallerby ando Brüssel phentscha o Špidla, le Romenge nan oda te akceptirinel, hot „andi EU milijoni manuscha stigmatisirungenca del“. Barikano ovla, hot o Romengere – fatschuvtscha jek sikadipeskero grad te uschtiden. O Hallerby mangel te o pomoschago le dajendar taj dadendar le Romane fatschunge. „Ada nan tschak jek koja le birovtschagender, te o daja taj dada iste upre pumare fatschuvtscha diken, kaj on tschatschikan uso ischkolakero dschivipe use te on.“

O Halleby phenel, hot o Roma o lek utscheder gendo le prik astaripendar le cile tschulipendar andi Europa upre sikan. Ov dikel, hot igen tschulo upral i lokali rik al, le Romenge te pomoschinel. O Špidla phenel, hot barikano hi jek ciloschno kesdipe. Ham naschtig jek jekoschno centralo angle gejipe del, kaj o socijali diferenctscha ando EU-schtotscha igen baro hi. Upro phutschajipe, ande saj vilagi i situacija le Romenge lek bibastaleder hi, phentscha o komisari, ov gejng asaj rankings hi. Prik astariptscha dija, na dur pal, ando Ungriko taj andi Tschechija. Ham „sakothan diskriminaciji del. Vaschoda ham naschtig phendo ol, hot nischta pe na micinel.“

Tweet