Le Burgenland trin neve patijaripeskere ledschaschtscha hi. O kulturakero birovtschago la thaneskera regirungatar o Fred Sinowatz visenschoftakero patijaripe, savo 1.000 Eurojenca dotirim hi, barikane ar dime kojenge ando than le thaneskere kulturakere forschinipestar, prik dija. Uso patijaripeskere ledschaschtscha te o Farajn Roma-Service genel. O farajn o dschivipeskere historiji burgenlanditike Romendar ando barikane projekti le anavenca „Mri Historija | Meine Geschichte“ taj „Amari Historija | Unsere Geschichte“ dokumentirintscha.

So i jury use phentscha

Ande ada barikano dokumentacijakero projekto usi historija le burgenlanditike Romendar, sajt o 1920te berscha, informtivi taj brigaschne vakeriptscha 15 dschenendar lakes. O pharipeskere gende le vakeriptschendar upri cajt le nacijonalsocijalismusistar paschlon. Sakone dscheneske taj sakona historijake jek ajgeni kenva kerdi uli. Barikane angle asdim ol, hot na tschak o transkripcijontscha le kerde vakeriptschendar angle paschlon, bariko hi meg, kaj te persönlichi kipi taj historijakere kipengere kveltscha and butschalim ule. Andar o vakeriptscha DVDs kerde ule, save ando kenvi ande hi. O upre liptscha, Betschiste ando „Phonogrammarchiv“, archivirim on.

Aja barikani dokumentacija pre tekstengere taj audijo visujelengere upre liptschenca, ar gejipeskero materijal le sikadipeske taj forschinipeske hi, taj jek falato uso upre butschalinipe jeke dschi akan na but aun dikle falatostar la burgenlanditika thaneskera historijatar, use ledschel.

Patijaripe uschtidija te i historikerkija Renate Schönfeldinger pra butjake pedar o dschivipe jeke dschidostar, savo mujsinipeskeri buti iste kerlahi taj savo jeka burgenlanditika familijatar retim ulo. O architekto Stefan Kalamar o visenschoftakero patijaripe vasch leskero forschinipe la bauninipeskera historijatar le nandscharipeskere kherestar ando gav Großhöflein, uschtidija.

Tweet