volksgruppen.orf.at: Phare angle tschidiptscha gejng o ungrike birovtschage asdel o „Europitiko Romengero taj Roasinipengero Forum“ (ERTF) le beschipeha ando Straßburg. Le ungrikoske angle tschdim ol, hot odola, save le ungrike Romen le puschkenca aun astarde, „schtotlichi pomoschago“ uschtidine. Vaschoda mangel o Forum o upre terdschajipe „naphandle schpecijalakere dschenendar“, phukal i ungriki nevipengeri agentura MTI. Rudko Kawczynski, anglebeschto le 1.500 civilakere organisacijendar ERTF phentscha, hot leskere delegaciji ando arte divesa o cile thana upre rodine, kaj atentatscha gejng Roma sina, taj odoj schtotlichi taj civili scherenca vakerde. Pal adala kherodiptscha ari alo, hot o tetertscha schaj te schtotlichi pomoschago uschtiden.

Birovtschage sa pujsto tschin

Kawaczynski upre sikal upro atentatscha ande Nagycsecs taj Tatarszentgyörgy, use save schtar Roma murdarde ule, telende jek pantsch berschengero tschau. O atentatscha latsche organisirim sina, kaj ham o birovtschage o jomi, kaj o dschene murdare ule, pujste tschite. O murdajipe duj Romendar ojs erschti ojs jagakeri bibast aun lim uli, ham aun dikiptscha odole atentatakere thanestar le harengerendar na dija.

Schpecijalakere dschene upre terdscharde te on

Vaschoda kamla i ERTF telal o ande cidipe la generaliskera schtotsaunvoltschoftatar hot naphandle schpecijalakere dschene upre tertscharde te on, save o astaripe le teterendar prik te len. Bajder kritisirinel o schero le forumistar o segregacijonakero programo la ungrika regirungatar, savo vascho na politischi kamipe nischta na anel. Kawczynski kritisirinel te o ungriko „Rundfunk“, nisaj khetan butschalinipe maschkar o Romengere organisaciji la regirungaha del.

Ando arte masektscha ando Ungriko papal aun astariptscha upro Roma sina. O tetertscha ham meg dschi akan falinen.

Tweet