„O lek barikaneder cil la arti regirungatar jek programo te ovla hi, save but tschaven ande internatscha te anel taj afka joma fi joma on le dschivipestar andar o Roma sidlungentscha phuterdo te on“, phentscha o slovakischi ministeriskero presidento Fico. „Mint amen papal jek generacijona upre parvaras, save le khetanipeske nisaj hasna keren“, phentscha o Robert Fico la socijal-demokratischi partajatar „Smer“ harne anglo parlamentoskere arodiptscha ande leskero vilago use. Odoleha o slovakischi premier sorale protestscha le manuschengere tschatschipendar ar phutertscha. O Branislav Tichy andar i „Amnesty International“ la nevipengera argenturake AFP phentscha, asaj projekto o lek bareder problemo le Romendar ol, savo o ar granicalinipe na phutrel. „Sako bajderi ar granicalinipe le Romane tschavendar andar o khetanipeskero sikadipeskero sistemo jek faphagipe lengere tschatschipendar hi“, phentscha o Tichy. Ando lejcti kurko erscht i UN-manuschengeri tschatschipengeri komisarkija Navi Pillay i meg buteder ertschaviskeri situacija le Romendar andi Slovakija kritisrintscha.

(volksgruppen.orf.at)