Radijo Kaktus / WEBRADIO oe1campus
5.2.2010, 20:00 & 6.2., 20:30 & 8.2., 11:30 orenge (on demand/mp3)

„Schaj papal pasirinel, adi vaj muguli aguneder sar agun“, lakel o Rudolf Sarközi, angle beschto le flogoskere grupnengere bejrotistar, 15 berscha palo bombakero murdaripe Erbate godschikane alava la sendungake Radijo Kaktus.

Andi rat uso 5. feberi 1995 eksplodirintscha upri rik la Roma sidllungatar jek bomba taj murdartscha le Josef Simon (40), Peter Sarközi (27) sar le Karl (22) taj le Erwin Horvath (18). O rasistischi faphageripe hi o lek phareder politischi keripe la dujta republikatar. O schtar Roma kamnahi jek tablina le upre pisinipeha „Roma pal andi Indija“ bejg te lel. Ham pal aja konstruktcijona jek garudi bomba sina, kaj o bombakero keraschi Franz Fuchs, savo 1999 mulo, astardo taj ande tschapim ulo.

Uso gondolipeskero mulatintschago upro than le murdaripestar valami 200 manuscha ale. Dschene le murdarendar, fatretertscha le Romengere organisacijendar, polgari sar fatretertscha la gemajndatar taj la oficijela Austrijatar use sina. O Johann Baranyai, dujto schero le Farajn Romestar Erba, angle gentscha jek lil le bundakere presidentistar Heinz Fischer, ande savo angle asdim ulo, hot o manuschengere tschatschiptscha le cile manuschenge glajch ande te likerel hi. O Norbert Darabos ando fatretinipe le bundakere kancleristar Werner Faymann vakertscha.

Amen iste amen te adi odoleha donde bescharas so o keriptscha hi soske „Hass“ taj rasismus del, phenel o Darabos ande pro vakeripe. Ando bajderi vakeriptscha anglo gondolipeskero than le birostar Gerhard Pongrac sar la thaneskera rotkijatarMichaela Resetar angle asdim ulo, hot o Burgenland jek than la mindenfelitika kulturatar hi. O Rudolf Sarközi, o anglebeschto le flogoskere grupnengere bejrotistar le Romendar, primintscha: „Amen le dschenen save murdarde ule schoha na pobisteraha.“ Ham ov te pal te gondolinel mukla, hot ori fagele, dschimeg o murdaripe le oficijeli thanendar ojs asavo behaundlim ulo.

O superintendent Manfred Koch taj o baro raschaj Paul Iby ande pumare gondolipeskere vakeriptscha taj moliniptscha meg avri tema aunvakerde. Meg te adi but burgenlanditike gemajndi del, ande save o Roma taj o Dschidovtscha ari tradim ule, ande save meg ham gondolipeskere tablini falinen. On sorale ari asdine, hot ada meg bajder jek pharipeskero punkto te ande o arto bersch lengera butjatar ovla.  (volksgruppen.orf.at)