Jubilejum: 75 berscha genereli erkler­ini­pe le ma­nu­schen­gere tscha­tschip­tschen­­dar

Ando 10to decemberi 1948 o Khetane Nacijon­tscha ande Paris o ge­ne­reli erk­le­ri­nipe le ma­nu­schen­gere tscha­tschip­tschen­dar ar dine – jek le tschule oren­dar le ma­nu­schi­pestar

„O cile manuscha naphandle taj glajchi ando pativ taj ando tscha­tschip­tscha hi.“ Adale so­rale ala­ven­ca kes­dinel o doku­mento, savo 1948 – upro pha­gerde koji le habu­ristar taj faschis­musistar – jek bari manu­schen­geri utopija for­muli­rintscha: I civili­sato­rischi sor le tscha­tschi­pestar mindig o tscha­tschipe le sora­lede­ristar te irinel. 75 berscha paloda, o 30 falati le UN-ma­nu­schen­gere tscha­tschi­peskere erk­leri­ni­pestar, ham tschak buter, schukar alava hi. Muguli ande latsche demo­kra­ciji, adi papal ando phu­tscha­jipe ter­dscharde le on. O khetano hango andar o bersch 1948 tschurel.

Ande oja cajt, o schtotschengero khetanipe oda globali manuschen­gero tscha­tschi­pes­kero kodeks, ari dija. Dschi­jakana, i 18-sche­ros­keri UN-ko­mi­si­jona telal i angle­be­schasch­kija Eleanor Roosevelt, i sorali dschuvli le agune US-pre­siden­tostar, vasch sako koja kejmpfin­lahi. Ham telal o anglunte cajchn le upre ale schudre haburistar schofim ulo, so dschi­jakana meg na dija: jek, le regi­run­gendar upro cile kon­ti­nentscha khetan ledschimi dekla­racijona le tscha­tschip­tschen­dar, save le cile manu­schenge use terdschon – tel diklo le telsch­ta­mini­pestar, la etnijatar, obste mursch vaj dschuvli vaj la reli­gijonatar. Hatek, kaj on ma­nuscha hi.

I resolucijona ando talalinipe ande Paris jek igen baro usephenipe uschti­dija – tschak poar pal like­ri­penca. „Amen adi angli granica use jek baro terdschi­jipe terdscho­jas“, afka i Eleanor Roosevelt ande lakero vakeripe. „Ada erkle­rinipe schaj i inter­nacijo­nali Magna Carta le cile manu­schendar ol.“

Gistakeri sor
Tschatschikan, i komisijona pal duj berschengeri debata, jek barika­no koja prik schaj be­schartscha. Use jek, pro­kla­mirin­tscha o papruschi o pativ le manu­schenstar ojs lek utscheder tscha­­tschi­peskero koja. Uso avro, antscha o erkle­rinipe le aun­diki­peha, hot basisa­kere tscha­tschip­tscha ojs andrutne schtotlichi aun­paschlo­jip­tscha ar te butschalinel hi: Manu­schengere tscha­tschip­­tscha universeli hi. Pasche o politischi taj socijali tscha­tschip­tscha, o doku­mento te o tscha­tschipe upro sikadipe, upri buti taj socijali fasor­ginipe ande phandla. Ada soralipe, andi glajchi cajt ham te leskero lek bareder na­soralipe hi.

Mint jek khetano hango le schtotschengere khetanipestar, tschak vasch o koja le naphand­li­pestar te uschtidel sina – kaj ar kerdo ulo, „hot o erklerinipe meg nisaj tscha­tschi­pes­kero khetan phand­li­pes­kero manu­schengero tscha­tschipe angle te anlahi“, afka o flogos­kero tscha­tschipes­kero dscheno, Bardo Fassbender.

O erklerinipe le manuschengere tschatschiptschendar hatek andi erschti dorik jek vertis­kero kanon hi, nisaj flogos­kere tscha­tschipes­kere phand­lipes­kere karak­teriha taj vaschoda te direkti basis na del, le ande tel pisime tscha­tschip­tschen­ca, panasi te tschil. Kekaj afka hi, le erkle­rinipe gistakeri sor hi. But leskere fala­tendar, ando nacijonali tscha­tschipe le schto­tendar ande fojinde. Taj ov, „tschak o kesdipe jeke igen bulhe kodifi­cirini­pes­kere pro­cesostar sina“, sar o flogos­kero tscha­tschi­­peskero dscheno Manfed Novak, phenel.

Jek redo konvencijonendar taj avre protokolendar andar o gondo le erkler­ini­pestar jek kompleksi manu­schengeri tscha­tschi­peskeri architektura kertscha. Asaj enja koji, o UN-schtot­scha sajt oja cajt ari dine, but falati imar mujsimo flogos­kero tscha­tschipe hi. Ando bersch 1966 duj manu­schengere tschatschipeskere diptscha ar dim ule: o civili- taj o socijali khe­tanipe. O erschti, hatek te o tscha­tschiptscha le tschu­lip­tschendar garan­tirinel; konkre­­tisirim ulo oda akor 1992 andi – la Austrijatar and ledschimi – UNO-dekla­ra­cijona pedar o tschulip­tschen­gere tscha­tschip­tscha. I anti­rasismusa­keri kon­ven­cijona le schot­schenge o arakipe angli dis­krimina­cija upre del, avre fatro­giskere koji o arakipe le dschuv­lendar, tscha­vendar taj le teschtune ariavkarden­dar del. I betschitiki manu­schengeri tscha­tschi­peskeri kon­ferenca, 1993 o dschi­jakana kerde koji soral­jartscha taj o drom uso keripe jeke UN-utsche ko­misa­riskere rotistar le manu­schen­gere tschatschipenge, kertscha. Nischta adalestar na delahi, te i khetani basis na delahi: o erkle­rinipe andar o bersch 1948.

Le Roman Urbaneristar

Ando: dROMa 71, Herbst/Terno dschend 2023
(→Themenheft/temakeri heftlina  30 Jahre Anerkennung/30 berscha aun­prin­dscha­ripe)

Tweet