So o rodipe pal jek phagerdo hajo pe­dar o Ro­ma phu­kal

Ande jek dokumentacijakero film taj an­de jek ken­va phu­kal o brita­ni­tiko John Henry Phillips jeke bari­ka­ne paj­tasch­tscha­gos­tar taj le lejc­ti kiva­ni­pestar jeke haja­schis­tar. Tscha­tschi­kan, ov ham bu­te­der phu­kal.

Nisaj koja, adaj upro Roma te gondolinel mukel: Jek terno mursch pomo­schi­nel jeke brita­niti­ke marine­ja­kere vetera­niske (94) leskere haburis­kere trau­maha ando tscha­tschipe te al. Uso auna­vipe andi Norman­dija 1944 les­kero hajo upre jek mina upre nasch­tscha taj le pajta­schenca tel gelo. ­Jek trauma, savo le phure, savo bojd kor­kore buter te dschal na dscha­nel, ham le dschuv­lenge mindig jek vodschi­kano probo hi, les­kero cilo dschi­vipe vodinel.

Leskero pajtaschi John Henry Phillips kamla le na lakle hajasch­tschen­ge jek gon­do­li­pes­kero bar te kerel taj vascho­da upro drom pe kerel, o phager­do hajo ando Ärmel­kanal te rodel. Ov histo­ri­ker­tschen taj bare pajis­kere arche­jo­logtschen mobi­li­siri­nel, andi Nor­man­dija ladel taj muguli te tauchi­nel siklol – mindig vodim jeka ka­meratar.

O dokumentacijakero film No Roses on a Sailor’s Grave (reschi: Daniel Oron), savo andral kerdo ulo, akan jerim upro festival­tscha sika­do ol, lejc­tivar uso filmis­kero kurko „Ake dikhea?“ ande Berlin. Ham andi masch­karutni cajt o John o materijal te jeka ken­vake prik butscha­lintscha: The Search akan bojd use Robinson ande London ari al.

Telal o telutno than

Upro erschti dikipe nisaj koja adaj adala histori­jatar phu­kal – na i tema, na o than, na o prota­go­nis­tscha –, hot adaj te i histo­rija jeke tschuli­pestar fahand­lim ol. Nisaj alaveha schundo ol, hot o terno mursch uso brita­ni­tiko Romen­ge­ro-tschu­lipe kerinel.

Telal o telutno than le phukajipe ham motiv­tscha hi, save prindschar­de hi. Mind adaj sa vasch o trauma le themes­kere haburis­kere berschen­dar pe hand­linel taj vasch o proba­linipe, jeke pobis­terde terdschi­jipeske, jek schu­nipe te scho­finel. Adaj vasch o aun­prindscha­ripe taj vasch jek pati­jardo gon­dolipe dschal: Te o John le biro jeke fran­citike schtraun­diskere forostar kher rodija taj jek gondoli­pes­kero mula­tintschago le brita­nitike nim­cenge angle tscha­latscha, ada upre scentscha ando slova­ki­tiko film Wie ich Partisanin wurde (diken dROMa 62) pal te gondo­linel mukel – le kojaha, hot o John uso fran­ci­tike prade vudara ande naschel.

Te le anavengere dime hajaschiskere grobo, leskeri analo­gija ando terdschi­jiptscha le Romen­dar hi: But schel­ber­schen­gero o ladasch­tscha mujsim sina, lengere mulen, dur donde, ande minden­fe­litike thana, ande te hanel. Te tradipe taj flogos­kero mur­daripe use vo­dintscha, hot but lendar oni grobos­kero than atschine. Dschi adi fami­liji na dschanen, kaj lengere dschene mur­darde taj and handle ule. „Mre famili­ja­kere dschenen nan grobi/ni­ko pal na gon­doli­nel/kaj on paschlon“, butschol ande jek poesija le Mircea Lacatusistar.

Bokreti ando baro paj
Te le Johniskeri ajgeni familija uso „Romani Travellers“ genel; leskeri daj upre jek terdscho­ji­pes­kero than upro them ali. Ojs schtu­dirimo arche­jologo John na dur pal, jek forschi­ni­pes­kero pro­jekto kes­dintscha, savo o histo­rischi terdscho­ji­pes­kere thana, afka akarde „Hatchin Tans“ te doku­men­ti­rinel. Ando internet kipi le „Gypsy Gravesen­dar“ sikal, save imar angle gene­ra­ciji upro agune terdscho­ji­pes­kere thana kerde te ujanahi. Upre jek phuro fami­lija­kero kipo leskeri daj te dikel hi, kada oj upre jek rito use jek grobo, kaj nisaj anav upre terdschol, tschan­ga­linel. Taj o John o phutscha­jipe peske terdscha­rel, sar ov ojs arche­jologo asaj tha­nen­ca um te dschal.

Gejng o kisetinipe le filmistar, palo gondolipeskero akto le na lakle hajasch­tschenge, o dschene lole roslini ando baro paj hin­tinen. Te ada, jek Romen­ge­ri-re­fe­renca: Mint sajt o 4to themes­kero kongre­so le Romen­dar, 1990 o Inter­na­ci­jo­nali Romen­ge­ro-Di ar kertscha, aktivis­tscha lole bokreti ande lenja, bare lofki taj bare paja pasch­laren: jek koja le gondoli­pestar, savo telal o Roma ando cilo them sik palal kerasch­tscha lakla.

Telal o patrijotischi use utschardo phukaji­pe le habu­ris­kere vete­ra­nistar, phukal amenge o John hat garudo – taj schaj, oni dschan­do kamipe – meg jek dujti historija: oja le kolek­tivi terdschi­ji­pestar le Romen­dar. Kaj use leskero bari­kano keripe le phure mur­scheske te vasch i ajgeni famili­jakeri historija dschal, sikal pe ande jek harni sek­venca, ande savi o John pedar leskero mulo papu vake­rel. Leha schoha pedar o bibas­tale koji le habu­ristar vaker­tscha. Taj akan imar buter na dschal.

Le Roman Urbaneristar

No Roses on a Sailor’s Grave, doku­men­taci­ja­ke­ro film, reschi: Daniel Oron, 83 min (2020)

John Henry Phillips: The Search – The true story of a D-Day survivor, an unlikely friend­ship and a lost shipwreck off Normandy, London: Robinson/LBBG (2022)

Ando: dROMa 64, Winter/Dschend 2021
(→Themenheft/temakeri heftli­na Bücher 2 / Kenvi 2)

Tweet