Radijo Kaktus / WEBRADIO oe1campus
16.10.2009, 20:00 & 17.10., 20:30 & 18.10., 11:30 orenge

„Learning together“ o anav hi le projektistar use save o cile projektiskere partnertscha pumen „khereste“” kheroden, kaj schaj analisirinen, diskutirinen taj siklon. Telal i kordinacija le „Polycollege“istar talalinde pumen Roma andar 5 vilagi Betschiste, kaj schaj pumen pedar pumare projekti ar parude. O projektiskere partnertscha andar i Svedija, Germanija, Rumenija, Francija taj Austrija ale. O Marcel Courtiade butschalinel imar andi Sorbonne universiteta taj ando Paris dschil. O francitiko Rom lingujist hi taj pre forschinipeha vaschi Romani tschib pomoschinel. „Mri motivacija soske me adaj som hi o upre asdipe le sikadipeskere standartistar andi flogoskeri grupn le Romendar“, phentscha ov ando vakeripe la Gilda Horvathaha.

O Daniel Erebeldinger Romengero fatreteri le rumenitiko partneristar taj mit inicijator le projektistar hi. „Schukar hi, upre asaj koja pe ar te parul“, phenel ov loschane. O Sinti jeke projektiha andar i Germanija fatretim sina. „Madhouse“ hi jek inicijativa andar München le Sinti & Romenge. I Michaela Starke pomoschinel le familijenge use lengere socijali problemtscha – te oj hi partneri uso „Learning together“.

O Herbert Depner andar o „Polycollege“ imar jek prindschardo hi ando Romengero projektiskero vilago. Imar but berscha lo use hi, te vascho sikadipe la flogoskera grupnatar dschal. Ov te vakeripeskere kurstscha ande Romanes ando „Polycollege“ kerel. O „Polycollege“ o kordinacijakero partneri le projektistar andi Austrija hi, savo la europitika komisijonatar potschim ol.

Emmerich Gärtner-Horvath, ORF Volksgruppenredaktion
volksgruppen.orf.at

Tweet