Ando Ungriko papal jek dscheno andar i flogoskeri grupn le Romendar murdardo ulo. Jek 45-berschengeri daj, savi korkore pro fatschu barvarlahi, ando norditiko ostitiko ungriko gav Kisléta andi rat upri hetvin kartschi dim uli. Lakeri 13-berschengeri tschaj igen sorale dukadi uli, oj ham prik dschivla, pisinen o ungrike mediji. O harengere na kamnahi, afka pisinel i neviptschengeri agentura MTI erschtivar oficijeli o etnitiko tel schtaminipe le opferendar te phukal. Nana prindschardo, te ada murdaripe jek rasistischi vaj krimineli keripe sina. Pal jek pisinipe le internetakere papruschengere nevipestar „index“ o teteri vaj o tetertscha o vudar ande prutschinde taj ando kher ande kartschi dine. O nochbertscha schunde o trin vaj schtar kartschi diptscha, i muli dschuvli taj lakeri tschaj ham erscht ratschaha pumare nipostar lakle ule. „I Romni jek butschalimi dschuvli sina, oj pra tschaj telal kultivirime keriptscha korkore upre barvartscha“, phenel o biro Sandor Penzes ando vakeripe le internetakere papruschengere nevipeha „index“. Niko ando gav na hajol ada, ko la dschuvlake valaso te kerel kamlahi.

Tweet