Radijo Kaktus / WEBRADIO oe1campus
16.5.2009, 20:30 orenge / on demand (mp3)

Farajn Im Ausland: Djurica Nikolić kertscha angle pantsch berscha khetan la socijalakera butschaschkijaha Elisabeth Ettmann o Farajn „Im Ausland“. O farajn pomoschinel Romenge ando socijali taj tschatschipengere phutschajiptscha. O diplomakero psychologe Djurica Nikolić Rom hi serbitike vurclinenca taj dikel pe ojs interkultureli multiplikatori. O farajn bitinel berotinipe taj pomoschago le cile manuschenge, save pumen „im Ausland” na hajode on. I Elisabeth Ettmann socijalakeri butschaschkija Betschistar hi. Oj phenel, hot o farajn odolen aun vakerel, save andar mindenfelitike sistemtscha duach tschoripe, tschulo siklipe, vaj vasch brigaschne situaciji ar tschapim hi. Djurica Nikolić hi jek dschivdo phurtakero dscheno uso Roma. Vasch leske but manuscha le serbitike Romendar Betschiste uso farajn ale. 

O lek barikaneder partneri le ehrenamtlichi butschalinipeskere farajnistar hi o „Paulo Freire Zentrum“ taj leskero keraschi Paolo Freire o anglutno kipo. Paolo Freire butschalinlahi ande tschoripeskere thana taj terdscharlahi ando maschkarutno punkto manuschenge na tschak te pomoschinel, ham len te uso oda te anel, pumari situacija te hajol taj söber te parul, phenel o Ettmann. I potschintschagoskeri basis le farajnistar „im Ausland“ an phenel o Ettmann sponsorendar, save latscha khetanipeskera butjake te pomoschinel kamna. O farajniskero kher andi „Pfarre “Maria vom Siege”, upro Maria-vom-Siege-Platz 3, 1150 Betschiste hi.

I premijere: O falato „Čin či baj taj naš!/Schneid deinen Ärmel ab und lauf davon!“ la Tina Leischatar ando lejcti tschetertekon i premijere sina. I Gilda Horvath kherodija o butjakero teateri ando „Hermann-Fischer-Hof“ ando dujto betschitiko gemajndakero becirk taj o erschti rejakcijontscha le publikumistar ande astartscha. O falato nikas schudre mukla. I resonanc le use dikaschendar sina le loschanipestar dschi use usi kritika.

(volksgruppen.orf.at)

Tweet