O finischi scheroskero foro Helsinki potschinel valami 40 Romenge, save dschi akan ande provisoritike khera upre jek than le socijal centrumistar dschivnahi, sakoneske 325 Euro la roasake ande pumari hajmat Rumenija. Baro falato le Romendar ada angle tschalajipe akceptirinde taj o loj aun line, phentscha jek fatreteri le helsinkeriskere dijakoniskere thanestar. Ando lejcti kurke i situacija le Romendar, save le khudilinipestar dschivnahi, duach komischi keriptscha bibastaleder uli: Ando kurko, jek thabojipe upro than le socijalcentrumistar Kalasatama jek dschivipeskeri komora taj jek baro verda, ande savo dschene dschivnahi, pujsto ulo. Vaschoda o foro Helsinki le socijalcentrumiske – vaschi sicherhajt – o schtrom tel tradija. O mangipe le pomoschagoskere organisacijendar, le Romenge feder kvatirtscha del, kaj ando lejcti kurke i temperatura upre minus 15° geli, o foroskero birovtschago tel phentscha, afka sar te upre tradipe le socijalcentrumiskere schtromistar, angloda o Roma pumari roas kesdinen.

Tschetertekon i „kudulinipeskeri grupn“ akardi sonderabtajlung le foroskere birovtschagostar phentscha, hot le ar potschintschagoha le roasakere lojendar kesdinen taj le Romenge jek ultimatum dschi kurke (28.11) bescharde ol, ande pumaro vilago pal tre dschal. Le priminde lojenca – 300 Euro loj le benciniske taj 25 Euro la ladipeskera cedulake Tallinake, o Roma ande pumaro telschtaminipeskero vilago Rumenija te peren. Palo vakeripe le vakeraschistar le masune socijali pomoschagostar ande Helsinki (dijakojisakero than), Pekka Tuomola, o Roma ada angle tschalajipe le forostar tschak vaschoda aun line, kaj andi boschitschakeri cajt tafka pumare familiji andi Rumenija kher te rodel kamna. But lendar ham o gondo hi, andi tateder berscheskeri cajt, papal ando Finland pal te al.

(volksgruppen.orf.at)

Tweet