Radio Kaktus / WEBRADIO oe1campus
27.3.2009, 20:00 & 28.3.2009, 20:30 orenge

„Wiener Melange“: Trin generaciji la familijatar Sarközi

I „Wiener Melange“ hi o anav jeke mulatintschagoskere redostar, savi pe mindenfelitike tschuliptschenca donde bescharel. I famiilja Sarközi terdschini ojs kulturakero ledschaschi maschkar o phutschajiptscha, pal vakeriptscha taj o publikum. I „Wiener Melange“ le keraschistar „Verein Transdanubien“ nevi kerdi uli. O arto kurko o Roma ando maschkarutno punkto la kiratijatar terdschine. I Marietta Wild o schero le farajnistar „Transdanubien“ phentscha, hot o gondo taj o kivanipe adale mulatintschagostar hi mindenfelitike kulturtscha te faphandel. I „Wiener Melange“ le ministeristar la socijalake Rudolf Hundstorfer prado ulo.

Vasch soske i anonymiteta

Rudolf Sarközi, anglebeschto le bajrotistar la flogoskera grupnatar le Romendar, pal gondolintscha sar sa kesdintscha. O akaripe le pradime thanendar sar „Romaplatz“ taj „Lowaraweg“ hi ceugn la but berscheskera butjatar le Kulturakere Farajnistar le austritike Romendar. Te upre ada ulo o drom la duga historijatar le Romendar ando foro te dikel. Ov phentscha, hot te respektirinel hi, te Roma ando pradipe na use pumare vurclini terdschon. Vaschoda but koji del andar i palutni cajt, save dschi adi meg ando schero le dschenendar hi. Ov meg te oda phetntscha, hot o terne andi cukunft o opferengero gondolipe bajder te keren.

Latscho klima Betschiste

Andreas Sarközi, o tschau le Rudolf Sarközistar, phukatscha, hot ov schoha la diskriminirungaha taj le rasismusiha konfontirim ulo taj ov o klima Betschistar ojs „Schmelztiegel“ le kulturendar igen kamel. Alexander Sarközi, enkel le Rudolf Sarközistar, deschuschov berscha phurano hi taj la terna generacija le Romendar andi diskusijona fatretintscha. Leske loke perel use pre vurclini te terdschol. Te ando sakodiveskero di nisaj tel dschumipe esbe te lel hi. Ov kamla pal pro studijum ando farajn te pomoschinel.

Emmerich Gärtner-Horvath, ORF Volksgruppenredaktion
volksgruppen.orf.at