Romano Dikipe, 8to feberi 2026
Televisakero magacin, ORF 2 Burgenland

→Streaming: on.ORF.at

Ando aktujeli ardipe la sendungatar Romano Dikipe phuka­vas pedar i na­schadi Romen­geri sid­lung andar Lacken­bach, pedar o artschi­jipe „Amen sam demo­kracija“, savo ando parla­mento prado ulo, jek vake­ripe le bare rascha­jiha Ägidius Zsif­kovics sika­vas taj o gondo­lipes­kero mula­tin­tschago upro aten­tato Erbatar.

I naschadi Romengeri sidlung andar Lackenbach
O kesdipe, afka sar mindig, amaro sendungakero redo „Upro jomi le naschade Romen­gere sidlung­tschen­dar le Burgen­landistar“ kerel. Adi o Adi Gussak ando becirk Uprutni Pulja dro­meske hi, hatek ande Lacken­bach. Jek bersch palo kija bersch, jek gondo­lipes­kero mula­tin­tschago Lacken­bach amen vodinel. Odoj upro Romen­gero gondo­lipes­kero than upro opfer­tscha le agune upre­likeri­pes­kere logeristar, gon­dolim ol. Ande ada sika­jipe ham vasch i aguni Romen­geri sidlung ande Lacken­bach dschal. Kaj li sina? Ko odoj dschiv­lahi? Del meg jomi? O Adi Gussak angle poar kurke ande dschen­des­kere situaciji le biro Christian Weninger taj le phure biro Heinrich Dorner restscha.

Artschijipeskero pradipe „Amen sam demokracija“
Angle 50 berscha andi Austrija, o flogoskero grupnengero tscha­tschipe, ar dim ulo. Ada tscha­tschipe o tscha­tschip­tscha le flogos­kere grup­nendar upre sikal. Ande, afka sar o keripe le flogos­kere grupnen­gere bajrot­schendar tel pisim hi, ersch­tivar le hor­vackenge, slo­veniti­kenge, ungri­kenge taj tsche­chitenge. O aun­prindscha­ripe le slova­kitendar ando bersch 1992 sina, le Romendar akor ando bersch 1993. Afka andi Austrija schov flogos­kere grupn aun prin­dscharde hi taj lenge vid­minel pe akan jek artschi­jipe ando parla­mento.

Ando vakeripe le bare raschajiha Ägidius Zsifkovics
Sajt 16 berscha o Ägidius Zsifkovics o baro raschaj Tikni Martonatar hi. Ojs burgen­lan­ditiko horvacko o khetan dschi­vipe le burgen­landitike flogos­kere grup­nendar, bari­kano ando vodschi leske paschlol. Leske ham te jek dschiv­doni gondo­lipes­keri kultura barikani hi taj afka ov odoleske and pe bescha­rel, hot ando gemajn­tscha, gondo­lipes­kere bara le mur­darde taj tradime manu­schenge, upre ter­dscharde te on. O Adi Gussak le bare raschaj ande leskero kher Tikni Mar­tonate restscha, kaj ando vake­ripe, barikano vasch i flogos­keri grupn le Romendar gelo.

Gondolipe upro atentato Erbatar
Terdschijiptscha del, save schoha pobisterde na on. Afka sar o atentato Erbatar ando feberi 1995. Ande oja cajt, schtar terne burgen­lan­ditike Roma jeka bom­batar ando pa­schipe lengera sid­lungatar, mur­darde ule. O gon­dolipe upre lende, jek fiksi punkto andi austritiki gon­doli­peskeri kultura hi. Jek bersch palo kija besch ando feberi, famili­jakere dschene taj pajtasch­tscha le opferen­dar khetan an, ham te fatre­tertscha le flogos­kere grup­nendar taj la politi­katar, khetan te gon­dolinel.

(Volksgruppenredakti ORF/Josef Schmidt)

Tweet