♫ O dad taj i tschaj – „Behind the door“

Februar 22nd, 2010  |  Published in Musik, Radio & TV

Radijo KaktusRadijo Kaktus / WEBRADIO oe1campus
19.3.2010, 20:00 & 20.2., 20:30 & 22.2., 11:30 orenge (on demand/mp3)

O ungriko muschikaschi Tibor Barkoczy, papal pestar te schunel mukel. Ando april kado ov i single „India“ angle terdschartscha, phentscha ov imar, hot ando terno linaj o album „Behind the door“ ari al. O dschilajipe i Melinda Stoika, i tschaj le Barkoczystar taj te prindschardi andar la aguna bandatar „DelaDap“, kerel. Ando vakeripe la Gilda Horvathaha, phende o dad taj i tschaj, soske on duj asaj meresch khetan butschalinen taj so le tschibtschtschen Romanes taj portugisisch khetan hi. O cover la singlejatar „India“ godschikan la tradicijaha valaso te kerel hi, phenel o Tibor Barkoczy. „Uproda diken tumen mro nipo upre jek familijakero kipo“, phukal o muschikaschi barikane.

O Tibor Barkoczy schov berschenca klavir te cidel siklija. 12 berschenca kesdintscha ov klasischi klavirjakeri schtudija upri „Budapester Liszt-akedemija“ te kerel. Maschkar o klasischi siklipe o Tibor Barkoczy pro kamipe upro jazz uschtidija. Dschidokle ov pra jazz-bandaha duach i cili Europa phirlahi, mindig buteder Betschi leskeri kunstakeri hajmat uli, kaj pe ov akor ando 80iger berscha tel mukla. Odoj akor bandlijakere- taj CDakere projektscha ando khetan butschalinipe avre kinstlerenca, sar le bandaha DelaDap taj le Louie Austeniha, kerde ule. Akan grod cidel o Tibor Barkoczy le Helmut Neugebaueriha taj la Melinda Stoikaha andi jazzakera formacija „Strictly Confidential“ taj te upri avipeskeri album „Behind the door“ butschalinel.

I Melinda Stoika Budapestiste upre bartschini. Imar ojs fatschuvkija sina la tikne kheliptscha andi ungriki schtotiskeri oper taj ando budabestiskero operetakero teateri. 1987 oj pre dadeha Tibor Barkoczy Betschiste ali. I Melinda bajder pre dadestar dschilavipeskero siklipe uschtidija. Ov la akor 14 berschenca imar ande pri banda khetan le Louie Austeniha te cidel mukla. 2002 i Melinda taj lakero dad le Stani Vana te prindscharel sikline taj i banda „DelaDap“ kerde, oja banda, savi ungriki Roma-jazz, elektronischi beatsiha khetan phandle. I Melinda dschilavlahi taj o tekstscha andi Romani tschib kerlahi. 2008 le Harri Stojkaha o album „Stoika & Stojka“ kertscha. Akan papal pro dschilavipe jeke projektiske lakere dadeske: „Behind the door“ otscha dija.

Dschila andi sendung: Dreams (Instrumental), Heart and Soul, India, Tu, Manges, How about us (Instrumental)

Emmerich Gärtner-Horvath, ORF Volksgruppenredaktion
volksgruppen.orf.at

Comments are closed.