Radijo Kaktus / WEBRADIO oe1campus
25.12.2009, 20:00 & 26.12., 20:30 orenge (on demand/mp3)

Le ardschumipeha „Romani muschika“ butvar becajchnim ol o hangi le balkaniskere charmiha vaj dschila save na oni tradicijonela ungrika hegedujaha na ar perel. Ham la terna generacija le Romane muschikaschendar avre gondi hi.

Willi Horvath (19) aka „Gipsy Stylez“ phenel hot ov o „Sido“ andar o Romengero khetanipe hi. Tekstenca pedar i „rejaliteta le dromestar“ probalinel ov anglutno kipo taj reperi ande jek te ol, taj le ternenge mindig phenel, hot on pumare kulturejli vurclini schoha na te pobisteren. Kekaj pe ov afka ande bescharel o Betschitiko Lovara adale kojeske na del ov aun. „Me mange ada na gondolintschomahi, hot mindschart i erschti dschili atschi manuschen aun vakerel“, phukal o Willi pedar o latschipe la „Gipsy Entertainment Crew-atar“. Mint leskeri erschti dschili „Floridsdorf“ upre dikipe kertscha. I terni reperiskeri grupn „Gipsy Entertainment Crew“ kertscha i dschili „1210 Wien-Floridsdorf“ taj o videjo ando internet sikatscha. O track gejng „Xenophophie“ tecintscha le scheroskere becikiskere birovtschagoske asaj latsche, kaj i dschili usi nevi hymne le floridsdorferendar schaj ovla.

O Adrian Gaspar ande avri rik dschal. Ov pe te donde bescharel le Mozartiha taj le Beethoveniha, ham leskero kamipe hi i jazz-muschika. O 22 berschengero Rom rumenitike vurclinenca imar 2003 uso vetbeverb le betschitike muschikane ischkolendar ojs lek terneder komponisto patjardo ulo. O Adrian Gaspar Trio ando oktoberi 2007 kerdo ulo taj o lek neveder projekto , o Adrian Gaspar Ensemble, ando oktoberi 2008 ojs basis le Adrianiskere muschikane komposicijonenge andi dschivipe vrischtschando ulo. Sajt ando oktoberi 2006 o Adrian upri universiteta la muschikake taj darstelendi kunstake Betsch ando foch komposicijona hi. Pasche schtudirinel ov privat „BigBand-Jazz-Arrangement“ uso Mathias Rüegg, o keraschi taj vodinaschi andar o „Vienna Art Orchestra“. Ov phukall, so bedejtinel jek muschikaschi te ol. „Mro vodschi marel ando 9/8-takt“, phukal ov pedar pro kamipe usi muschika.

Alexander Horvath aka „Shavo“ tschak le palutne anaveha le „Gipsy Stylez“ valaso te kerel hi, ham avre kojenca na. Leskero keripe sakodiveskero hi, ov orijentirinel pe uso schtudijo genies sar Pharell taj Timbaland. Ov na tschak ordineri „tracks“ kerel, ham ov te khetan pre cousiniha „Milo Mills“ atmosferischi „Backgrounds“ le „Catwalk“ la „MQ Vienna Fasion Week“ kerel. O „Duo“ akarel pe „Diamond Refinement“ taj bareder koji imar kamna te kerel. Bojd imar o erschti muschikano videjo kerna. Barikane o Alexander ari asdel. „Me man souliha ar bescharav, o vodschi la muschikatar, na tschak Hip-Hop. Ham te Hip-Hop nisaj vodschiha naschtig dschil.“ O upre dschajipeskero „producer“ butschalinel imar kinstlerenca sar le Vincent Buenoiha taj la Rooftop Cliqueha, MC Schokoiha vaj DJ Mezuianiha (Juicy Crewiha) khetan.

Emmerich Gärtner-Horvath, ORF Volksgruppenredaktion
volksgruppen.orf.at

Tweet