Ando bundakero birovtschago use jek „Enpuete“ o arbutschalinipe jeke neve flogoskere grupnengere tschatschipestar ar kerdo ulo. I regirung peske upre dija, dschi ando bersch 2011 jek putripe le dujtschibtschengere gavengere tablinenge ando Kärnten te lakel. Use pro vakeripe o schtotiskero sekretetari Josef Ostermayer (SPÖ) phentscha, hot usi aja tema vasch jek latscho putripe butschalim ol. Ostermayer becajchnintscha o gavengero tablinakero phutschajipe ojs jek pharo taj ambicijonirti cil. O cile iste jeke putripeske butschalinahi, o politischi partajtscha sar te o flogoskere grupnengere fatretertscha. Ham o phutschajipe le duj tschibtschengere becajchjnungenge andi nimtschki taj slovenitiki tschib na tromal o cilo avro pedar te bugolinel.

Diskusija pedar i tschatschipeskeri novele

Diskutirim ulo uso „Enpuete“ te jek le flogoskere grupnengere centrumistar ande ando angle tschalajipe jeka tschatschipeskera novelejatar. Ostermayer ar asdel, hot use ada tschak vasch jek diskusijonakero papruschi dschal. Akan o pradimo dijalog phutschlo hi. O dschenengero visenschoftleri Rainer Münz te gondolinel mukla, saj pharo hi, jek flogoskeri grupn te definirinel. Ov trin upre diptscha dikel, savo jek nevo tschatschipe le te putrel. Afka dschalahi lo use o gavengere tablini ando Kärnten lek feder uso aun prindscharipe le Kärntner Slovenendar ando pradimo than. Adala ovlahi hi jek simbolischi joma. Angloda o Münz meg phentscha, jeka tschulipake o tablini na use te mukel hi jek sikajipe, hot odola na kamle on taj hot jek problemo del.

Vakeripe tel te likerel taj soraleder te kerel

Münz meg use phentscha, jeka novelejaha le flogoskere grupnengere tschatschipestar o vakeripe tel te likerel taj soraleder te kerel. Pasche o tschatschipe, andi ajgeni tschib arsiklipe te uschtidel, delahi te buteder hasna le virtschoftakere thanenge. „Amenge manuscha pekan adale vakeripeskere dschanipeha.“ Bajder schaj peske o dschenengero visenschoftleri te jek „Portabilität“ le tschulipengere tschatschipendar angle te terdscharel. On schaj o tschatschiptscha le flogoskere grupnengere niposke te avrutnon le beschipeskero thanestar keren, kaj but andar pumaro than ando bare fori dschan.

Glajchi terdschajipe le cile tschulipendar

O ar butschalinipeskero papruschi le flogskere grupnengere centrumistar le neve tschatschipeske, kaj te o aguno justicakero ministeri Maria Berger (SPÖ) mit butschalintscha, dikel ando mogo o glajchi terdschajipe le cile austritike tschulipendar angle. Bajder schaj o tschatschiptscha la cila flogoskera grupnake taj na tschak odole niposke panasi tschito ol. Te jek definicijona le begrifistar flogoskeri grupn ande hi. Vaschoda schaj bajderi grupn save meg na aun prindscharde flogoskere grupn hi definirt schaj on.

(volksgruppen.orf.at)

Tweet