Kada o kurko kesdintscha o foro Helsinki jek Romengero cerhakero logeri taj tikne kaschtengere khera, save upre jek baro bar ando finitiko scheroskero foro terdschonahi taj andar i „U-Bahn“ te dikel sina, harengerendar te schuscharel mukla. But Roma andar o centrali Europa iste sik odole thanestar gele. Akan o Roma upro pomoschago privati dschenendar taj christlichi pomoschagoskere organisacijendar iste uscharen. Lokali reportertscha phenen hot o schuscharipe mirno tel naschto. O foro Helsinki imar sajt berscha buteder schel Romenca, save andar i Rumenija taj Slovakija an, matschka taj kermuso khelen.

O biro Jussi Pajonen ar phenel hot ov foro guduschenca na kamla. Na del tschatschiptscha, save ar phenen, hot EUakere polgartscha andar o vilago ar tradim schaj on. Vaschoda o birovtschagi le saniteri taj jagakere harengere tschatschipenca butschalinen, kaj le Romen andar lengere provisorischi khera ari schaj tschiden. O pomoschagoskere organisaciji la foroskera regirungake angle tschiden, jek rasistischi politik te kerel taj ada koja tel te tagadinel, hot o Roma buti roden taj ande but periptscha duach famitlinipe privati inicijativendar te jek laken. O finischi mediji aja tema sorale le pradipeske upre sikatscha.

Tweet