Roma sam
Radijo Burgenland, 26.10.2009: On Demand (mp3)

So avre ojs pisimaschtscha vaj kipenca ardschuminen, probalinav me le schmidinipeha ar te dschuminel, phenel o Rom Karl Horvath andar Mattersburg, use pro vakeripe le artschijipeskere pradipestar ando KUZ Telutne Schicate. Inspiracijonakere kveltscha leskera kunstatar hi sako diveskere dikiptscha, terdschiviptscha taj i historija taj adiveskeri cajt le burgenlanditike Romendar. Asaj kompleks leskero formakero mindenfelitiko, afka mindenfelitiko leskere temtscha hi, savenca pe o Karl Horvath donde bescharel. Karl Horvath ando 16.3.1950 andi Tikni Martona upro them alo taj Mattersburg upre bartschino. O erschti schov berscha pra fatschuvtschengera cajtatar dschivlahi i familija ando aguno dajakero taj dadeskero kher leskere dadestar, jeke siklime hiboskere utscharipestar. Ov siklija i buti le schmidinipestar taj kunstakere schmidinipestar ando Wr. Neustadt, kaj leskeri daj dad taj na dschande leske, jek siklipeskero than anglo than odoj te lakel. I akceptanc le Romendar uso beverbinipeskero vakeripe terdo atschel taj le Karl Horvathiske mukla ada sa te dikel, hot ov avrijal esbe lim ol. Pal jek taj epasch bersch siklipeskeri cajt ando Wr. Neustadt o kovatschi Abraham andar Mattersburg le Karl Horvath upre lija. Ov pri siklipeskeri cajt kisetintscha taj ojs jekoschno le 40 beverberendar o masteripeskero telschunipe tel tschitscha.

O artschijipe „Kunst andar i jag“ schaj tumen ando KUZ Telutne Schicate, Hauptplatz 8, 7432 Telutni Schica, andar o 20. oktoberi dschi 22. novemberi 2009 aun diken.
Hetvin dschi tschetertekon 8:00 ori – 15:30 ori. Paraschtuja: 8:00 oro – 12:30 ori

Emmerich Gärtner-Horvath, ORF Volksgruppenredaktion
volksgruppen.orf.at

Tweet