Pedar 31.000 dschilaschtsch la germanijakera castingshowake „Deutschland sucht den Superstar“ meldinde pumen, akan pal but anglutne riktscha o lejcti 15 kandidatscha ar rodim hi: Telal o ar rodime, save suboton (20.15 orenge ando RTL) ande jek liveshow pumaro dschanipe te sikal tromen, hi te i Sintiza Sarah Kreuz andar Bergheim pasche Köln.

Uso tema andi sendung ulo lakero Sinti-telschtaminipe, kada la juryake pasche o Dieter Bohlen ando naschipe le anglutne riktschendar phentscha, hot oj ojs Sintiza naschtig sa peha te kerel mukel. Kada o televisakero senderi le kandidatschen vasch o kvotenengero tradipe ando bikini taj jeka pythonaha te dschilal mukla, i 19-berschengeri dschilaschkija jeke vakeripeha upre pro telschtaminipe upre sikatscha taj asaj angle dschilajipe tel phentscha. Oj ham pal poar minutscha, urtschim jeke T-Shirt-kloadliha, pri dschili dschilatscha.

Te oj jerintscha, nan i Sarah i jekoschni Sintiza vaj Romni, savi use jek nacijonali televisakeri show barikanipe kertscha: 2005 jerintscha o akor 26-berschengero Rom Hamdija Seferovic o horvacko „Big-Brother“. Taj usi slovakitiki show „Die Slowakei sucht ihren Superstar“ i Romani-tschaj Viera Berkyova 2007 jerintscha. Pedar i rat uli i 16-berschengeri uso idol le slovakitike terne Romendar.

Tweet