Kaj meg mindig prik astariptscha gejng o Roma ando Ungriko del, kamna  o Roma andar o vilago ar te roasinel. But schel Roma vaschoda jek aunrodipeskero pisintschago vasch pomoschago uso ar roasinipe uso thaneskero söbstfavojtinipe le Romendar (OCÖ) kerde, sar o angle beschto Orban Kolompar prik i nevipeskeri agentura MIT phukal. O koji vaschoda ar roasinipe hi o „atentatscha taj i diskriminacija gejng i flogoskeri grupn“.

O Andras Bader phukal, hot leskeri familija vasch o atentatscha, save gejng o Roma kerde on, andi dar dschil. Lengera cukunft nan nisaj latscho angle dikipe taj o dschivipe but etnitika diskriminacijatar phare kerdo ol. O ande tschapinipe le manuschendar andi Romengeri-murdaripeskeri serija meg nan nisaj koja vaschoda, hot buter na al use neve murdariptscha taj aun astariptscha gejng Roma, phenel o Bader. I dar, le Romendar save adaj andi provinca dschin bari hi, hot manuscha del, save ada tradipe schaj bajder kernahi.

Pedar o baro paj ar te roasinel

O Jozsef Farkas – jek save asaj ar roasinipeskero pisintschago kertscha – kamla pal leskero ar phenipe vaschoda pedar o baro paj ar te roasinel, kaj o ekstremi tschatschipe ando Ungriko asaj soralo ulo, hot i tschatschipeskeri ekstremitiki Ungriki Garda neve kerdi uli taj i Jobbik-partaj lakera radikalitika idejologijaha o and cidipe ando Europitiko parlamento schofintscha. Vaschoda molinel ov taj leskeri familija la OCÖ vasch „politikano pomoschago“.

(volksgruppen.orf.at/dROMa)

Tweet