Ischkolakere kontejnertscha la serbitika Ro­men­ge­ra sid­lun­ga­ke „Bangladeš“

Pal but kurkeskere butja taj but dombi upro drom ande Novi Sad o verdi le schtar bare kon­tej­ne­renca latsche aun ale. O kon­tej­ner­tscha, la fir­matar TEERAG-ASDAG, la te­lutni austri­ja­kera schpe­di­cijo­na­tar LTS-Neuninger Lo­gistik ande Novi Sad ladim ule. La Flogos­kera Utscha Isch­ko­lake le Bur­gen­lan­di­tike Ro­men­dar (website) o but ber­schen­gero pajtaschi Thomas Eckert o la­dipe vodin­tscha taj doku­men­ti­rin­tscha.

Erschti kontaktscha uso serbitike Ro­men­gere fatre­ter­tscha ando ke­ripe jeka schtu­dija­kera roa­sa­tar 2012 phandle ule. Ande oja cajt o schero la Romen­gera VHSatar Horst Horvath avre dsche­nenca i Romen­geri sid­lung „Bang­ladeš“ ande Novi Sad kher rodine. Na dur pa­loda jek fatre­teri jeke serbi­tike schtu­den­ten­gere khe­ta­nipes­tar vasch pomo­schago uso prik berscha­ripe jek sikli­pes­kere pro­jek­tistar le tscha­venge andar „Bang­ladeš“ mangla. O finan­ci­jeli koji le schtu­den­ten­gera taj meschte­ren­gera butjake imar la Pestza­lozzi-schtif­tun­ga­tar use phen­de sina. Ham ando tikne khera la sid­lunga­tar thana fali­nahi, kaj siklim schaj ol. Afka o gondo bar­vado ulo, o atscha pal kontej­ner­tscha upre te li­kerel.

I firma TEERAG-ASDAG schtar phureder kontejner­tscha, save ham andral latsche hi, prik dine. Akan i cajt sina, o tel ladipe te orga­ni­si­rinel. Kaj ada igen kutsch sina, andi karika le butscha­schen­dar la Flogos­kera Utscha Ischko­latar le Bur­gen­lan­di­tike Romen­dar upri jek rik ar kerdo ulo, hot sako pestar loj del taj upri avri rik hot pajta­schen­dar pomo­scha­gos­kere loj mangen. Aja ak­ci­jona te akan meg naschel.

Le schtudentengere fatreteriha Nenad Vladisavljev ar kerdo ulo, hot jek kran iste odoj ol, savo o kontej­ner­tscha tel schaj asdel, taj afka te sina. Le phari­pes­kere ver­denge, save o kon­tej­ner­tscha tel la­dine, ada ladipe use jek cajta­kero pro­ba­linpe ulo, mint upri gra­nici igen but pha­ri­pes­kere verdi terdscho­nahi. Afka o kon­tej­ner­tscha erscht jek di paloda aun ale, sar ar kerdo sina, ham akan pa­sche terd­schon (sa khetan 50 m²) kaj le akan use sik­li­pes­kere khera kisetim iste on.

Cil adale siklipeskere projetistar hi, le tschaven upri isch­ko­la­keri situ­a­cija and te ter­dscha­rel, paloda lenge uso sikli­pe te pomo­schinel, taj te le dajen taj daden ando ke­ripe ande te phan­del, kaj on i isch­kola taj o sikli­pe te pati­ja­ren te siklon.

(volksgruppen.orf.at)

Tweet