Romengere-familiji ando Belfast ari tradim ule
Juni 26th, 2009 | Published in Rassismus & Menschenrechte
115 manuscha iste ande jek khangeri naschi gele – prik astariptscha barenca upro khera, manuscha dukade ule
Bisch Romengere-familiji iste keden pumare khera ando suditiko Belfast sik pal mukle. 115 dschene, tel lendar jek pantsch divesengeri phuri tschajori, i rat ande jek khangeri iste atschine taj sridon ande jek naphandlo centrum ando Belfast fi harni cajt ande len kvatirinde. O familiji imar jek kurko rasistischi motivirti tradipenge ar bescharde sina. Use adala prik astariptscha o boklengere stakli lengere kherendar barenca ande tschalade ule, so le darutne opferenge dukajiptscha antscha. Nochbertscha le Romendar jek „Bürgerwehr“ upre terdscharde, kaj upre lengere khera schaj obocht den. Odola paloda le lokali papruschengere nevipeske Belfast Telegraph phende, hot odola dschene, ojs dschene la rechtsekstremi grupnatar Combat 18 pumen te prindscharel dine. Oja tschalavipeskeri grupn andar i British National Party ari ali, savi le manuschen andar avre vilagi na kamel. On vodinen pumaro anav ando gondolipe upro Adolf Hitler usar o erschti taj o ofto beto le alfabetistar tel: A taj H.
O than le prik astariptschendar, o universitetakero than ando suditiko falato Belfastistar, nan konfesijoneli homogen, kaj but schtudentscha odoj atschon. Ham o pasche paschlimo „Village-Viertel“, andar savo ando merc pal jek lobdakero khelipe maschkar o Polnitike taj Nordiritike bojd 50 avrethemeskere manuscha aun astarde ule, protestantisch hi. O paramiliteritiko khetanipe Ulster Defence Association (UDA) odoj soralo favurclim hi. Khetanipe maschkar UDA taj Combat 18 del.
Rasistischi motivirti prik astariptscha, save le harengerendar ojs asave upre lim ule, ando lejcti schov berscha ando Nordirland schtarvar buteder ule. Aja forma le prik astaripestar ando naschipe le smiromiskere procesistar upro than konfesijoneli motivirti prik astariptschendar ande tretintscha. O dujto schero le erschti ministeristar andar Nordirland, Martin McGuinness andar i Sinn-Féin-Partaj, akartscha o lek terneder prik astariptscha ojs „jek ladschakeri episoda“. I erscht völimi birovkija andar Belfast, Naomi Long, mangel respekto taj pativ le Romenge. Oj na kamla use te dikel, sar valako andar Belfast ari tradim ol. O Junijor-ministeri Jeffrey Donaldson phenel pedar o ari tradime Roma: „Sa, so odola kamen hi, andi Rumenija pal te dschal, taj odo jek na igen latscho phenipe hi, savo adaj andar Nordirland bitschado ol.“ Na tromal te ol, hot rasismus, sar agun konfesijoneli prik astaripe, o khetanipe donde tradel.
