Svecija: Triti schtotiskero pisintschago

I situacija le ladaschendar andi Svecija ando lejcti berscha na ulo feder. Ada sikal jek ar kerdo pisinipe le europitike rotistar uso akaripe nacijonali tschulipendar, savo o bundakero rot sridon ar dija. Ada hi o triti schotiskero pisintschago la Svecijatar. Ov i situacija le mindenfelitike nacijonali tschulipendar taj le kojendar sikal, save o bund taj o kantontscha sajt o bersch 2009 kerde, kaj o lejcti angle diptscha prik bescharde schaj on. Pharo, afka ando pisinipe terdschol, hi i situacjija le ladaschendar, save meg mindig pumaro epasch nomadischi dschivipe dschin: Terdschojipeskere- taj duach gejipeskere thana falinen. Uso keripe le terdschojipeskere thanendar le ladaschenge o gemajntscha iste valaso keren.

Jek baro falato le svecijakere ladaschendar Jenischi hi. O avrethemutnengere ladaschtscha, save linaj duach i Svecija roasinen, Roma taj Sinti hi, save butvar andar i Francija, Germanija, Italija taj andar i Espanija an. O bundakero rot meg phenel, hot o ladaschtscha butvar ojs na cilo falato le svecijakere dschenendar esbe lim on taj vaschoda i diskriminacija del. Ov ham meg phenel, hot o lokali flogoskere völiniptscha tschak akor uso keripe neve terdschojipeskere- taj duach gejipeskere thanendar vodinel, te o dschene buteder akceptanca taj patschajipe entviklinde.

(volksgruppen.orf.at)

Tweet