Kai Dikhas: Galerija le Sintijenge taj Romenge
Mai 3rd, 2011 | Published in Einrichtungen, Kunst & Fotografie, Veranstaltungen & Ausstellungen
Upro „Moritzplatz“ ando foro Berlin jek galerija kerdi ol, savi palo aun diptscha la galerijatar Kai Dikhas erschtivar andi Germanija ande tel parude artschijiptscha o butja le flogoskere grupnakere kinstlerendar sikal. O organisatortscha phenen, hot aja i erschti galerija andi vest Europa hi, savi pe la tschulipengera kunstake aun lel. „O Sinti taj o Roma andi cili Europa but diskriminacija iste esbe len“, phentscha o kinstlerischi schero Moritz Pankok. I galerija andi arti cajt jek avro kipo te sikal kamla, sar oda, savo o dschene ando schero ledschen. Andi sikadipeskeri kunst – na afka sar usi muschika – meg but iste kerdo ol. „Andi muschika o Sinti taj o Roma ando utschipe aun ale. Odoj imar prindschardo hi, hot but latsche muschikaschtscha del, save adale tschulipestar tel schtaminen.“
Ham te andi sikadipeskeri kunst andi lejcti cajt but pe kertscha. „Ande mindenfelitike europitike vilagi nevi cajtakeri kunst le Sintijendar taj Romendar del. Ham dschi akan tschak temporeri mulatintschage delahi.“ Jek koja sina o Romengero pavilijon „Paradise Lost“ 2007 usi Biennale andi Venecija. I galerija ando foro Berlin mindig butja le Romengere kinstlerendar te sikal kamla. Kekaj o butja igen mindenfelitike hi taj ande mindenfelitike mediji ande on, hi len jek khetanipe: „O kinstlertscha pumare telschtaminipeha taj butvar le diskriminacijengere kojenca ande pumare vilagi donde pumen bescharen“, phenel o Pankok.
