Günter Grass: „Skandal la Germanijake“
November 4th, 2010 | Published in Literatur & Bücher, Politik, Rassismus & Menschenrechte
Günter Grass gejng tel ispidiptscha
O literaturakero-nobelpatijaripeskero ledschaschi Günter Grass adi ande jek pradimo lil le germanitike ministeriske le andrutneske Thomas de Maizière (CDU) taj le thaneskere ministerenge le andrutneske anglo baro tel ispidipe le Romendar andar i Germanija varnintscha. „I cili Europa upri Francija dikel taj hojanel pedar o um gejipe le tradime taj tschore Romenca andar i Rumenija, taj andi glajchi cajt jek tel ispidipeskeri akcijona ando baro stil andar i Germanija ando Kosovo ando gejipe hi“, phentscha o Grass. O germanitike plantscha o francitike keriptscha ando hischo terdscharen, pisintscha o Gras, savo jek schtiftung, savi le Romenge pomoschinel, avrenca kertscha. Ada hi „jek skandal la Germanijake taj jek hypotek le europitike smiromiske“, phentscha o 83-berschengero.
Le tel ispidipeha eseri Romendar andi Bulgarija taj Rumenija i Francija poar kurke ando pradipe terdschini. Andi Germanija dschin 8500 Roma andar o Kosovo, save palo tschatschipe iste ar roasinahi. I bundakeri republik ham use phentscha, hot na del bare tel ispidiptscha, on poloke taj sar dschi akan le dschenen papal ando Balkan-schtot pal vodinen.
